LEGAZPI CITY-Pinangenotan ni Presidente Ferdinand Marcos Jr. ngonian na Biyernes an sarong cabinet meeting kun saen inaprubahan kan Gabinete an propwestong 2027 National Expenditure Program na isinangat kan Department of Budget and Management (DBM).
Segun kay Presidential Communications Office (PCO) Secretary Dave Gomez, pinag-olayan asin inaprubahan an propwestong pambansang budget para sa taong 2027.
Dai muna isinapubliko an kabilugang kantidad asin iba pang detalye kan propwestong budget ngani dai maenotan an pormal na pagsusumiter kaini kan Presidente sa Kongreso.
Dai man nagtao nin iba pang detalye si Sec. Gomez kun ano pa an pinag-olayan sa ginanap na Cabinet meeting sa Palasyo kan Malakanyang.
Nakatakdang isumiter kan Presidente sa Kongreso an National Expenditure Program sa Agosto 14, 2026, duwang semana makalihis an saiyang State of the Nation Address sa Hulyo 27.
Nasa P6.793-trilyon an pambansang badyet para sa fiscal year 2026.
Mas halangkaw ini nin dai mababa sa P467 bilyon o 7.4 porsiyento kumpara sa P6.326-trilyong badyet kan 2025.
