LEGAZPI CITY- Naglatag na nin mga preparasyon an gobierno provincial kan Catanduanes katakod kan pinag-aantisiparan na epekto kan bagyong Inday.
Segun ki Catanduanes Governor Patrick Azanza sa intrevista kan Bombo Radyo Legazpi na partikular na pinag-aantisiparan ninda an mga pag-uran na posibleng magkawsa nin pagbaha siring man an storm surge.
Mahigot man na nagpagorumdom an opisyal na ipinagbabawal muna an paglalayag huli sa makukusog na ukol kan kadagatan.
Marurumduman na nakabandera an tropical cyclone wind signal no. 1 sa northern asin central portions kan Catanduanes.
An biyahe man sa mga barko sa mga pantalan sa provincia an kakanselaron sana kun igwa na nin tropical cyclone wind signal sa point of origin asin point of destination.
Dugang pa ni Azanza na igwa man na inalokar na pondo para sa pagtabang sa mga mai-stranded sa Tabaco port sa Albay na mapasiring sa Catanduanes.
