Inapod ni House Lead Prosecutor Gerville Luistro na trayumpo para sa mga Pilipino an enot na aldaw kan impeachment trial sa Senado, makalihis umusad an proseso kan paninimbagan na itinalaan sa irarom kan Konstitusyon.
Sa ginibong press conference makalihis an enot na aldaw kanpaglilitis, sinabi ni Luistro na importanteng lakdang an pagbubukas kan impeachment trial huli ta naipaotob na an mga mekanismo kan paninimbagan na nakalaag sa Saligang Batas.
Segun saiya na parehong naihayag kan prosekusyon asin depensa an saindang opening statements asin nadiskutir man an mga isyung ipiglatag sa pre-trial conference.
Sinabi rin ni Luistro na pupuunan na ngunyan na aldaw nin Martes an presentasyon kan mga ebidensya kan prosekusyon.
Enot na ihahampang kan prosecution panel an ebidensya katakod kan enot na article of impeachment na nagtutukaw sa suboot pagbabanta.
Dugang pa kaini na pigbibisto man kan impeachment court an suhestyon na pagkasunod-sunod kan prosekusyon sa paghahampang kan Articles of Impeachment, na magseserbing giya sa pag-usad kan paglilitis.
