LEGAZPI CITY—Nagtagama an gobierno provincial kan Catanduanes nin P20 million para sa duwang deep well na gigibohon sa banwaan kan Virac huli sa kakulangan nin tubig sa lugar.
Segun ki Provincial Disaster Risk Reduction Management Office Catanduanes Emergency Operations Chief Roberto Monterola, sa intrevista kan Bombo Radyo Legazpi, an recipient kan nasabing deep well an water utilities na nagsusuplay nin tubig sa Virac.
Makalihis maaprubaran an pondo kan Sangguniang Panlalawigan an nakapende na man sa rikas nin proseso kun pano ini gagamiton sa water utilities.
Dugang ni Monterola na kadaklan kan mga munisipyo sa provincia na nakakaeksperyensya nin problema asin sa ngunyan nagkaigwa na nin contingency planning para sa pagresolbar kan suplay nin tubig.
Mensahe man kan opisyal sa mga lugar na dae abot kan saindang water utilities na atamanon an pinagkukuwaan nin supaly nin tubig urog na padagos na namamatean an water crisis sa nagkapirang lugar sa provincia.
