Kinumpirmar kan Philippine National Police Forensics Group (PNP-FG) na 1,400 sa kabilugan na 2,000 na tulang asin mga artifacts na narekorber sa Taal Lake an hali sa tawo.
Sinabi ni PNP-FG Director Col. Pierre Paul Carpio, puon pa kan Hulyo kan nakalihis na taon nagpapadagos an pinahewas na search and recovery operations.
Igwang walong team na nagsasagibo nin rotational duty kaibanan an Philippine Coast Guard na nakadesignar sa apat na parte kan Taal lake.
Dugang pa kan opisyal na an mga na-recover na tulang an nagsairarom sa serye nin mga tests kaibanan an medico-legal analysis, forensic, anthropology, radiographic imaging, dental examinations asin DNA testing.
Kinakipuhan pa nin mga kumpletong forensic examinations kan gabos na mga nabawing ebidensiya.
Aminado man si Carpio na madidifisilan an mga eksperto na mabisto an mga tagsadiri kan mga tulang huli sa kondisyon kan mga ini huli sa kahaluyan na nakababad sa Taal Lake.
