Nagpaotob nin mas mahigot na security measures ang Senado kasabay kan itinakdang deadline sa pagsunad ni Vice President Sara Duterte kan saiyang simbag sa Articles of Impeachment.
Segun sa abiso, sagkod alas-7 nin banggi sa Hunyo 1, an pwedesir sanang magsumiter nin simbag an Bise Presidente, personal man, sa paagi kan abogado, o sa electronic mail.
Magigiromdomang pormal na naihatod ki Duterte an summons kan Mayo 20, duwang aldaw makalihis mag-convene ang Senado bilang impeachment court.
Piglalaomang mapuon an impeachment trial sa Hulyo 6 kung saen mahampang si Duterte sa mga reklamong culpable violation of the Constitution, graft and corruption, asin betrayal of public trust.
Huli sa piglalaomang pagdagsa kan media asin suportadores asin kritiko kan Bise Presidente, naglatag ang Office of the Senate Secretary kan mga panuntunan para sa coverage kan asin nagtalaga nin mga lugar kun saen pwedesir magsagibo nin press briefing ang kampo ni Duterte.
Segun sa Senado, obheto kan mga lakdang na masierto an matanos, salbado asin episyenteng proseso kan pagsunad nin simbag mantang natatawan man nin bastanteng access ang media sa importanteng kaganapan.
Nakikipagkoordinar naman an National Capital Region Police Office (NCRPO) sa Office of the Sergeant-at-Arms nganing siertohon an kaayusan sa palibot kan Senado.
