LEGAZPI CITY- Mahigot na pigtututukan ngunyan an mga produkto na parte kan ipinaotob na price freeze sa provincia kan Albay.
Ini an kasunod kan pagsasairarom sa state of calamity kan walong mga lokal na gobierno sa provincia, huli sa epekto kan aktibidad kan bulkang Mayon.
Kaibanan digdi an mga ciudad kan Legazpi, Tabaco, asin Ligao siring man an mga banwaan kan Santo Domingo, Malilipot, Daraga, Guinobatan, asin Camalig.
Segun ki Department of Trade and Industry Albay Provincial Director Noel Bunao sa intrevista kan Bombo Radyo Legazpi na nagluwas sa saindang monitoring na compliant man an mga grocery asin supermarkets sa nasabing kasuguan.
Sakop kan price freeze an mga basic commodities, basado sa ipinaluwas na price bulletin kan ahensya na dapat na sunudon kan mga estabishimento de negosyo.
Sinabi kan opisyal na an presyo kan pangenot na babarakalon antes ideklarar an state of calamity an dapat na mag-iral.
