LEGAZPI CITY—Dismayado asin dagit an namamatean ngunyan para sa mga pamilya kan mga biktima kan war on drugs makalihis an pagpalyar na maarestar si Senador Ronaldo “Bato” dela Rosa.
Magigiromdoman si dela Rosa an nadadawit sa suboot crime against humanity ni dating Presidente Rodrigo Duterte sa International Criminal Court.
Sa nagin intrevista kan Bombo Radyo Legazpi ki Dahlia Cuartero, ina kan saro sa mga biktima kan giyera kontra droga na si Jesus Daboy Cuartero, naglalaom sindang madadakop na ini huli sa anom na bulan sindang naghalat asin urog nang may warrant of arrest para digdi.
Ipigdoon man kaini na dae dapat na mag-drama si Bato na gari siya an biktima, huli sa an saindang grupo an tunay na biktima sa giyera kontra droga.
Dugang niya na labi pa an due process na itinao sa senador alagad sa mga biktima an wara nin due process; kaya masasabi ninda na an hustisya sa Pilipinas an para sana sa mayayaman asin gahaman sa kapangyarihan.
Pangapudan man ni Cuartero ki Presidente Ferdinand Marcos Jr., na gibohan nin lakdang na maarestar si “Bato”; asin para man sa mga senador na dae sinda magbuta-butahan huli sa may kasalanan ini sa ley asin may obligasyon sinda na isurendir ini, siring man na aram na may warrant of arrest na sa ICC an naunambitang senador.
Pakiolay man niya sa namamanwaan na matabangan sinda sa pagpangadyi nganing makua an hustisya para sa mga biktima sa giyera kontra droga sa nacion.
