LEGAZPI CITY—Arestado an sarong indibidwal sa ikinundusir na buy-bust operation sa banwaan kan Camalig sa provincia nin Albay.
Binisto an suspek na si alyas “Alan”, sarong High Value Individual, 39-anyos, tubong Sultan Kudarat asin presenteng nag-iistar sa banwaan kan Daraga sa kaparehong provincia.
Nakumpiskar digdi nasa 250 gramos nin pigtutubudang shbau na may estimated street value na P1,700,000 asin an buy-bust money na ginamit operasyon.
Naarestar ini makalihis na magpabakal nin pigtutubudang ilegal na droga sa sarong poseur buyer.
Ginibo an operasyon sa pinagsarong operatiba kan Provincial Intelligence Unit Albay, Camalig Municipal Police Station, Office of the Deputy Regional Director for Operations – Regional Police Drug Enforcement Unit 5, Special Operations Units Police Drug Enforcement Group 5, asin Philippine Drug Enforcement Agency Albay Provincial Office sa koordinasyon sa PDEA Regional Office 5.
Nasa kustodiya na ini kan mga otoridad para sa magkakanigong disposisyon.
