LEGAZPI CITY-Ipighayag kan Legazpi City Water District (LCWD) na nagtetenir na normal asin bako kontaminado an suplay kan tubig sa ciudad kan Legazpi sa tahaw kan mahiwasang ashfall dara kan padagos na aktibidad kan Bulkang Mayon.
Segun kay Legazpi City Water District General Manager Rico Salazar, sa intrevista kan Bombo Radyo Legazpi an wara man nin apektadong water source orog na haros ‘balon’ an mga ini alagad pigpo-protehiran ninda an saindang mga ekipahe.
Piglalaagan man ninda nin tarpaulin an mga water control structure ngani dai maglaog an mga abo.
Pigkakahaditan man ninda kun mawaran nin suplay kan kuryente na pirmihang apektado an suplay kan tubig.
Sa ngonian, nagsasagibo na sinda nin koordinasyon sa ALECO, na tulos man na nagtatao nin ayuda sa sainda.
Nagtao na man nin instruksyon na enkaso igwang ashfall o anumang peligro, pwedisir na maabot an pasilidad.
Sinabi pa kan opisyal na dai man nagka-problema sa Purok 4 asin 5 kan Barangay Bonga asin ngonian target ninda na magkaigwa nin mga tangke sa mas haralangkaw na portion, kabale an Bonga, Mabinit, asin Buyoan.
Afuera sa sitwasyon, pinagbabantayan man ninda an pag-abot kan El Niño, kun kaya pangapudan sa mga konsumidores na i-practice an pag-conserve kan tubig, huli ta an natitipid digdi posibleng maitao pa sa ibang mga kaharongan asin establisimyento.
