Posibleng maglangkaw an presyo kan bagas sa nacion asin umabot sa P60 hanggang P62 kada kilo sa Setyembre.
Sinabi ni Agriculture Secretary Francis Tiu Laurel Jr. sa pagdangog kan Senate Proactive Response and Oversight for Timely and Effective Crisis Strategy (PROTECT) Committee, na pinaglalaoman an paglangkaw kan presyo huli sa mahal na abono, na haros doble an presyo sa P1,650 hanggang P3,000.
Ipinaliwanag niya na kun magpapadagos an mga paraoma sa tradisyunal na paggamit kan urea asin dae malipat sa alternatibong fertilizers na ipigrekomendar kan Department of Agriculture (DA), mas malangkaw an gastos sa produksyon na magreresulta sa mas halangkaw na presyo kan bagas.
Dagdag pa kan opisyal na pinag-aadalan kan ahensya an nagkapirang mga lakdang ngani na mapugulan an paglangkaw kan presyo, kaibanan an pagpapaotob nin “rice blend” asin “corn blend.”
An rice blend an paghahalo nin imported asin lokal na bagas, siring kan 70-30 o 60-40 ratio ngani na mamantenir an suplay asin makatabang sa mga paraoma.
Mientras tanto, an corn blend an kombinasyon kan puting mais asin bagas sa 50-50 na proporsyon bilang alternatibong pagkaon.
