LEGAZPI CITY-Aminado an Department of Justice na warang garantiya na mapupugulan si dating Ako Bicol Party-list Representative Zaldy Co na makahale sa Czech Republic.
Kasunod ini kan anunsyo ni President Ferdinand ‘Bongbong’ Marcos Jr. na pagkakadakop sa dating kongresista, alagad sinabi man ni Justice Secretary Fredderick Vida na igwang posibilidad na nakaluwas na ini kan nacion.
‘Posible’ suboot na nakahale na sa Czech Republic si Co huli ta dai pa siertong an hurisdiksyon kaini sa nacion.
Ipigheras man niya na wara pang malinaw na impormasyon an Department of Justice sa eksaktong lokasyon kan dating kongresista sa nabanggit na nacion.
Dagdag pa ni Vida na makakatabang an ‘red notice’ hale sa International Criminal Police Organization o INTERPOL kun magluwas na sa Czech Republic si Co.
Marurumduman na presenteng nasa Czech Republic si Justice Sec. Vida poon kan ika-24 kan Abril.
Kasuguan suboot ini ni President Marcos, na beripikahon an mga naenot nang impormasyon, aramon kun nuarin asin pano mapapauli si Co, asin pahigiton an koordinsyon asin sistema na pigpapaotob sa nacion.
Mantang segun sa kalihim, sa ngonian an nahihiling na pinakamarikas na paagi, iyo an kagyat na pagpapauli sa dating kongresista sa Pilipinas sa paagi kan deportasyon.
