LEGAZPI CITY—Ipigkahadit kan grupo nin parasisira an pigsasagibong Balikatan exercises sa pagultangan kan Pilipinas asin Estados Unidos sa nacion sa tahaw kan nagpapadagos na paghalangkaw sa presyo kan produktong petrolyo.
Segun ki Pambansang Lakas ng Kilusang Mamamalakaya ng Pilipinas (PAMALAKAYA) Spokesperson Salvador France, sa intrevista kan Bombo Radyo Legazpi, apektado kaini an pamumuhay kan mga parasisira huli sa gigibohon ini sa nagkapirang baybayon kan Pilipinas.
Mas lalo suboot kaining mapupugulan an pamumuhay kan mga parasisira na enot nang naapektaran kan padagos na paglangkaw kan presyo kan krudo, huli sa magkakaigwa nin sarong lugar na isasarado na maresulta sa dae makapagpalawod an mga parasisira.
Dugang ni France na hasta sa ngonian an wara pa sindang nareresibeng subsidy alagad mas pigtawan prayoridad pa suboot an siring na aktibidad.
Ikinahadit man niya na baka madamay pa an mga Pilipino huli sa igwang Enhanced Defense Cooperation Agreement (EDCA) sites an Piipinas asin Estados Unidos sa nagkapirang lugar sa nacion urog na ngunyan na may tensyon an US, Israel asin Iran.
Mientrastanto, pangapudan man kaini sa mga parasisira na mapugulan an Balikatan exercises alagad kun madagos man an dapat igwang dakulang demand sa gobierno mapadapit sa saindang pangangaipuhan huli sa ipigprayoridad kaini an nasabing aktibidad.
