LEGAZPI CITY – Matrayumpong naisalbar kan mga kapulisan an apat na pasahero makalihis tumaob an saindang pigsasakayang motorbanca sa kadagatang sakop kan Rapu-Rapu sa provincia kan Albay.
Segun ki Rapu-Rapu Municipal Police Station Chief of Police Police Major Joseph Melitante sa intrevista kan Bombo Radyo Legazpi na piglaog nin tubig an saindang pigsasakayang bangka huli sa makukusog na alon asin kargado pa ini nin construction materials.
Nakatabang man ninda sa pagrescue an mga personahes kan Bureau of Fire Protection, Rapu-Rapu Municipal Disaster Risk Reduction and Management Office, Philippine Coast Guard Rapu-Rapu Sub-Station asin an mga residenteng harani sa pinangyarihan kan insidente.
Pagdoon man ni Melitante na huli sa matrayumpong operasyon, wara man nin nairido sa mga sakay kan motorbanca asin nakauli na sa saindang mga harong.
Mientrastanto, nakatutok man an mga personahes kan Rapu-Rapu Municipal Police Station sa pagpapa-otob nin pazy orden urog na an pagkakadakop sa suspek sa pambabadil sa sarong paraoma sa Barangay Gaba kan kaparehong banwaan asin provincia.
Nagkokondusir man sinda nin pagbisita sa mga Barangay nganing magkaigwa sinda nin magayon na koordinasyon sa mga residente sa pag-implementar kan katuninongan sa komunidad.
