Inihayag kan bagong Supreme Leader kan Iran na si Mojtaba Khamenei na an saiyang nasyon an habo nin gera laban sa Estados Unidos asin Israel, alagad handa sindang idepensa an mga deretsos kaini bilang sarong nasyon.
Sa saiyang mensahe na binasa sa state television, sinabi niya, dai sinda naghanap nin gera asin habo ninda ini.
Alagad, ipigdoon niya na dai ninda isusuko an saindang lehitimong mga deretsos sa ano man na sirkumstansya, asin nagsambit kan “resistance front,” na garing nagluluwas na mga kaalyado kan Iran arog kan Hezbollah sa Lebanon.
An pahayag an nag-abot pirang semana makalihis na an saiyang ama, si Ali Khamenei, an nagadan kan Pebrero 28, sa enot na aldaw kan gera.
Dai pa sana nahahaloy, nagtugot an Iran sa duwang semanang tigil-putukan sa Estados Unidos, na pwedesir magbukas kan dalan para sa orolay sa katoninongan, makalihis kan mga pananakot nin sarong matinding pag-atake gikan ki US President Donald Trump.
Pig-enganyar man ni Mojtaba Khamenei an mga Iranian na dai magpundo sa pagpahayag kan saindang mga pananaw sa publiko sa ibong kan igwa nin ceasefire.
Segun saiya, importante an boses kan banwaan sa resulta kan negosasyon.
Mientrastanto, dae pa siya nahihiling sa publiko puon kan magtukaw siya bilang lider, asin pigtutubodan na nairido sa parehong pag-atake na ikinagadan kan saiyang ama.
Kadaklan kan saiyang mga pahayag an ipinapaluwas sana sa paagi nin mga nakasurat na mensahe na pigbabasa sa telebisyon.
May mga haka-haka si Trump na pwedesir na gadan na siya, alagad ipigdoon kan Iran na nagpaparahay na siya sa saiyang mga lugad, asin nagpaluwas nin mga ladawan niya sa ibong kan dai kaini pigsabi kun nuarin ini kinua.
