LEGAZPI CITY – Pighayag kan Albay Schools Division Office na kadaklan sa mga eskwelahan an nakapagkondusir na nin 2026 end of school year rites.
Alagad segun ki Albay Schools Division Office Spokesperson Froilan Tena sa intrevista kan Bombo Radyo Legazpi na may iba man na mga eskwelahan na tinugutan nindang magkondusir nin end of school year rites makalihis an semana santa.
Basado man sa saindang datos, uminabot sa labi 65,000 na mga estudyante sa pribado asin pampublikong eskwelahan sa enterong provincia an nagtapos asin nag-graduate na sa saindang pag-aadal para sa school year 2025 – 2026.
Pagkatapos suboot kan mga end of school year rites, abala na man ngonian an mga paratukdo sa pagrelease kan mga report card kan mga estudyante na gagamiton sa enrollment para sa masunod na school year.
Nagmamawot man an opisyal na wara nang estudyante sa provincia kan Albay an dae makapasar asin magin repeater alagad gigibuhon gabos kan mga paratukdo an mga remedyo nganing maipasa kan aki asin makabalyo sa panibagong grade level.
Nagpa-abot man nin pagbati si Tena sa mga completers asin graduates sa provincia kan Albay ngonian na school year 2025 – 2026 siring man sa saindang mga magurang asin paratukdo na naghingoa nganing mapatapos an mga estudyante.
