Nagtakda an Sandiganbayan 3rd Division nin 10-day bail hearing puon sa Abril 6 para sa kaso nin malversation na pigkaka-imbweltuhan ni dating Senador Ramon “Bong” Revilla Jr., Bulacan First District official na si Brice Hernandez, asin iba pang akusado katakod kan suboot P92.8 million na ghost flood control project sa Pandillacan Bulacan.
Gigibohon an hearing sa aga asin hapon, asin piglalaoman na madurar sagkod sa Abril 24.
Segun sa korte, katuyuhan kan bail hearing na siyasaton kun igwa nin supisyenteng evidencia nganing tugotan an temporaryong libertad kan akusado mantang nagpapadagos an paglilitis.
Kasunod kaini, nakatalaan man na magpoon an trial proper sa Abril 7 sa Sandiganbayan 4th Division, kun saen mapresentar an Ombudsman nin 56 prosecution witnesses na iyo an magpapatunay kan mga suboot anomaliya.
Kabali sa mga akusado afwera ki Revilla asin Hernandez an nagkapirang dating opisyales kan Department of Public Works and Highways (DPWH) Bulacan First District Engineering Office.
Segun sa prosekusyon, dae naimplementar an flood control project na pinondohan nin haros P92.8 milyon, kun kaya pigkokonsiderar ining ghost project na dakula an pagkalugi sa kaban kan banwaan.
An kasong ini an saro sa pinakadakulang graft and malversation proceedings ngonian na taon, na mahigot na pigbabantayan kan publiko huli sa gabat kan akusasyon asin bilang kan mga testigo.
Kun mapatunayan na nagkasala, posibleng mahampang an akusado sa magabat na penalidad kabali na an pagkakakulong asin pagbayad nin danyos.
Sa presente, mahigot na pinahimutikan ni Revilla asin kan saiyang kampo an mga alegasyon, mantang nagpapahiling nin kumpiyansa an Ombudsman sa saindang mga evidencia asin testigo.
Sa maabot na Abril, mapoon na an masinsinang trial na piglalaoman na mabubuyagyag pa an mas dakol na detalye manungod sa suboot ghost project, na saro sa pinakadakulang kaso nin kurapsyon na pigkakahampang kan sarong dating senador sa historia kan nasyon.
