Sarong lame excuse an pag-apod ni Atty. Nicholas Kaufman na hyperbolic sana an mga kontrobersyal na talumpati dati ni dating Presidente Rodrigo Duterte.
Sa entrevista kan Bombo Radyo Philippines ki Southern Illinois University Graduate Program Director Dr. Raymund Narag, sinabi kaini na excuse sana an pag-apod ni Kaufman na magin hyperbolic o exaggerating an mga public speech dati ni Duterte.
Wara man suboot nin makusog na ebidensya na naipahiling si Kaufman laban sa iprinesentar na evidencia kan International Criminal Court (ICC) prosecution panel, urog na an paggamit kan mga talumpati kan dating presidente.
Kun kaya palusot na sana kan abogado an mga kontrobersyal na pahayag bilang mga exaggerations, sa ibong kan nagseserbi ini bilang mga extra-judicial confessions.
Binalikan ni Dr. Narag kun papano tinanggap kan publiko an siring na mga pahayag, urog na kan si Duterte nagkakampanya pa sana sa pagkapresidente.
Ginamit suboot kan pulis an mga pronouncements kan presidente bilang giya sa saindang trabaho asin sa pag-implementar kan kampanya laban sa iligal na droga, sa ibong kan taliwas ini sa moralidad asin ley.
Ngonyan an nasa puntong pigsisingil na si Duterte huli sa rekord kan saiyang mga talumpati, alagad an saiyang kampo pigpipirit na sabihon na an gabos na ini an exaggeration sana, minsan nagresulta na ini sa mahiwas na garadanan.
Kan hinapot an US-based criminal justice expert kun nyata kadakol na mga pulis an nagsunod pa man liwat sa madugong drug war, sinabi niya na syertong igwa sinda nin pagduda kan ipinaotob an kampanya.
Kadakol man suboot an naghale sa serbisyo huli ta dae ninda masikmura an mga nangyaring garadanan, base man sa record kan gobyerno, mantang an iba boluntad man na naghiras kan saindang mga eksperyensya sa nakaaging administrasyon.
