LEGAZPI CITY—Nagtutubod an mga pamilya kan mga biktima nin war on drugs ni dating Presidente Rodrigo Duterte na kaya pa kaining maghampang sa ibong kan pagsumiter nin waiver mapadapit sa dae pag-atendir kaini sa nakatalaang confirmation of charges hearing para sa kasong crimes against humanity.
Segun ki Rise Up for Life and for Rights Deaconess, Norma Dollaga, sa intrevista kan Bombo Radyo Legazpi, na kun kinaya kan dating opisyal na maggibo nin mga polisiya para sa paggadan an kakayanon man kaini an responsibilidad huli sa pinanindgang niyang tama an saiyang ginibo durante kan kasagsagan kan war on drugs sa nacion.
Pig-agyat man ninda si Duterte na gamiton an saiyang isog para sa proseso kan pagkua kan katarungan asin en kaso wara man siyang kinakaipuhang itago an yaon man an korte nganing ipahayag kun ano man an paglilitis an gigibohon saiya.
Tinawan-doon man ni Dollaga na para sa mga pamilya nin war on drugs kan dating Presidente na tulo man sanang bagay an kinakaipuhan ninda sa pagkua kan hustisya, enot digdi an paninimbagan, ikaduwa an dae na mautro an kulog asin kadifisilan sa namamatean kan mga padangat sa buhay kan mga biktima asin ikatulo an social justice.
Dugang kan opisyal na preparado man an mga pamlya kan mga biktima na mag-monitor asin magsimbag sa mga kahaputan kan publiko para sa mapaparaning confirmation of charges kan dating Presidente.
Mientrastanto, padagos man an pangapudan kan grupo sa mga biktima kan war on drugs na dae pa naidodokumento huli sa takot an pwedesir na magrani sa saindang ofisina nganing makadungan sa boses na nagmamawot nin katarungan mapadapit sa nasabing orolay.
