Pinapundo kan Department of Agriculture (DA) ang reclassification application kan mga bulod asin iba pang tanuman nganing mapangatamanan an mga dagang pang-agrikultura mantang pinag-aadalan kan gobierno kun pano ini hihigotan.
Ipinaotob ni Agriculture Secretary Francisco Tiu Laurel Jr. an moratorium sa paagi kan Department Circular No. 1 na iniluwas kan Enero 5, kaya tulos na ipinundo kan ahensya an pagtanggap asin pagproseso kan mga aplikasyon para sa Land-Use Reclassification Certification asin madurar ini sagkod Hunyo 2026.
Ipoproseso pa man kan Department of Agriculture ang mga aplikasyon na naisumiter bago ipaotob an freeze alagad dae kaini aaksyunan an mga apela mantang may moratorium pa.
Ipinaotob kan DA an moratorium huli sa padagos na land conversion asin pagkahadit na mabantol an produksyon nin pagkaon kaya mas dakol an kakaipuhanon na iimport na bagas asin magigin bihag an nacion kan foreign suppliers.
Ipigtatakod kan DA an paramientras na pagpundo sa mas mahewas kaining pagbubusol sa 2026 nganing pakusugon an food security, kasabay kan mga lakdang na sinabi kaining magpapakusog sa supply chains, magpapahusay sa farm infrastructure, asin maghahalangkaw kan farm productivity.
Mantang dae pig-aaksyunan an mga land conversion application, pag-aadalan kan DA an regulatory framework asin kun pano hihigotan an regulasyon sa land conversion.
