Na-octaba an naka-schedule na kawat kan Golden State Warriors asin Minnesota Timberwolves sa Minneapolis makalihis an sarong insidente nin pambabadil na kinaiimbueltohan kan mga federal agents, na ikinagadan kan sarong 37-anyos na lalaki.
Ipina-octaba an kawat nganing enot an seguridad asin kaligtasan kan komunidad sa Minneapolis susog sa NBA.
An insidente an ikatulong pambabadil ngunyan na bulan na kinaiimbueltohan kan mga federal officer, kun saen an biktimang si Alex Pretti na sarong ICU nurse an nabadil kan sarong Border Patrol agent sa sirangang parte kan ciudad, mga duwang milya sana an rayo gikan sa Target Center kun saen dapat gigibohon an laban.
Huli digdi, dae idinagos an kawat asin inilipat nin Domingo (January 25) kaiba na man an saro pang naka-schedule na paghihilingan kan duwang team sa Lunes.
Mientrastanto, naapektaran man an iba pang mga aktibidad sa lugar huli sa insidente asin nagkaigwa nin darakulang protesta sa sentro kan ciudad bilang protesta sa operasyon kan federal immigration enforcement sa pagtugis kan mga imigrante, sa irarom kan administrasyong Trump.
