LEGAZPI CITY-Preparado an konseho kan Barangay Baligang sa Ligao City para sa posibleng mga emerhensya huli sa padagos na pagalburuto kan Bulkang Mayon.
Segun kay Punong Barangay Romel Bobis, sa intrevista kan Bombo Radyo Legazpi na preparado sinda siring man an mga ipapanaong hygiene kit asin facemask sa mga residente.
Nakahanda man suboot an saindang rescue vehicles para sa posibleng mga rerespondihan.
Enkaso man na maglangkaw pa alert level kan Bulkang Mayon, gabos na mga residentes sa saindang barangay an ipapaebakwar.
Sa presente kaya nasa 26 na pamilya o 94 indibidwal na sakop kan 6km permanent danger zone an presenteng nagtetenir sa evacuation center.
Nakakamate man sinda nin diit na ashfall alagad napundo ini huli sa pag-uuran sa saindang lugar.
Pighigotan man an mga residente na maglaog sa 6km permanent danger zone alagad may mga nagkapira an nagbabalik sa saindang lugar huli sa mga ataman na karabaw.
Pigsierto man kan opisyal na suportado kan lokal na gobierno an mga pangangaipohan kan mga nasa evacuation center.
