LEGAZPI CITY—Nagpaluwas nin sea travel advisory an Coast Guard Catanduanes makalihis na itinaas sa gale warning signal an norte asin sirangang parte kan isla provincia.
Segun ki Coast Guard Station Catanduanes Deputy Commander Lieutenant Junior Grade Reynaldo Aringo Jr., sa intrevista kan Bombo Radyo Legazpi, apektado kan advisory an mga banwaan kan Pandan, Bagamanoc, Panganiban, Viga, Gigmoto, Baras asin Bato.
Huli digdi suspendido an mga paglawod kan mga lunadang pandagat na mas hababa sa 250 gross tonnage siring kan bangkang pangsira.
Kada man suboot na nagpapaluwas sinda nin sea travel advisory an nagpapatrolya an saindang mga personahes sa kada munisipalidad nganing magtaong impormasyon mapadapit sa kamugtakan kan panahon.
Nagpagiromdom man si Aringo sa mga residentes na dae na muna magpirit na maglawod urog na an mga may saradit na bangka huli kan presenteng sitwasyon kan kadagatan.
Mientrastanto, pighayag man kan opisyal na nagin maayos man an pagpaotob kan Oplan Byaheng Ayos durante kan nakalihis na holiday season.
