LEGAZPI CITY – Dae pa pigkokonsidera sa presente kan lokal na gobierno kan Camalig, Albay an pagsasagibo nin evacuation efforts makalihis na itaas sa alert level 2 an Bulkang Mayon kasunod kan paglangkaw kan mga parametrong pigbabantayan.
Alagad segun ki Mayor Caloy Baldo sa intrevista kan Bombo Radyo Legazpi na nakapreparar na sinda enkasong lumala pa an aktibidad asin sitwasyon kan bulkan partikulamente na an nasasakupan nindang barangay na nakapalaog sa 6-km permanent danger zone.
Nakabantay man sinda sa mga barangay kan Anoling, Quirangay, Sua, Tumpa, Salugan, asin Cabangan nganing tulos na i-ebakwar an mga residentes enkaso magkaigwa nin phreatic eruption.
Pig-anunsyar niya man na paramientras na nindang ipinagbabawal an paglaog sa lugar na sakop kan saindang banwaan na nakapalaog sa 6-km permanent danger zone para sa saindang kaligtasan.
Pigtaram pa kan opisyal na may mga nakadesignar nang mga evacuation centers para sa mga apektadong barangay urog na kun magsakat pa sa alert level 3 an alerto kan bulkan.
Nakatalaan man siyang makipag-olay sa mga Punong Barangay kan mga nakapalaog sa 6-km permanent danger zone asin kan Municipal Disaster Risk Reduction and Management Council nganing diskutiron an mga dapat pang gibuhon afuera sa naenot nindang lakdang.
Pagirumdom ni Baldo sa saiyang residentes na naka-istar sa mayon unit area na magin rigmat, antabayanan an mga abiso kan mga magkakanigong ahensya mapadapit sa presenteng aktibidades kan bulkan, asin dae basta magtubod sa mga bako otorisadong impormasyon na pwedesir maglakop sa social media.
