LEGAZPI CITY—Pighayag kan Philippine Institute of Volcanology and Seismology (DOST-PHIVOLCS) na nakakaapektar an kamugtakan kan panahon sa pagdugang nin rockfall events sa Bulkang Mayon.
Segun ki PHIVOLCS Chief Volcano Monitoring and Eruption Prediction Division Mariton Bornas, sa intrevista kan Bombo Radyo Legazpi, na pag maparos an panahon asin nakakaeksperyensya nin pag-uuran an masyado man na na-destabilize an lava dome sa itaas kan nasabing bulkan.
Kun kaya maoobserbaran na tuyong may makukusog na paros asin may nag-uusbong na lava an dakol man an nairerehistrong rockfall events kan saindang ahensya.
Dugang ni Bornas na laoman na dakol an mairerehistrong rockfall events sa kada may maraot na panahon sa lugar.
Liwat man na nagpatanid an opisyal sa peligro kan lahar flow partikularmente sa banwaan kan Guinobatan urog na kun makusog an pag-uuran huli sa may haloy nang nahihiro an mga lumang deposits sa southwestern na parte kan Mayon.
Mientrastanto, padagos man an pagiromdom kan ahensya na ibitaran an paglaog sa 6-kilometer radius Permanent Danger Zone huli sa huma kan rockfall, pyroclastic density currents o uson, biglaang pagputok, asin iba pang volcanic hazards.
Nagpatanid man an opisyal na dapat igwang kahandaan huli sa nagpapahiling nin senyales an bulkan nin tsansa na magputok liwat siring kan nangyari kan taong 2018 asin 2023.
