LEGAZPI CITY-Pignegaran kan pamayo kan House Appropriations Committee asin Nueva Ecija Representative na si Mikaela Suansing an alegasyon na ₱150 milyon na “insentibo” an pig-oopresir sa mga kongresista na maboto na pabor sa ratipikasyon kan 2026 General Appropriations Bill (GAB).
Segun ki Suansing, wara ma nin impluwensya an liderato kan Kamara sa saindang pagboto.
Ini an kasimbagan ni Suansing sa alegasyon ni Batangas Representative Leandro Leviste na may nangyayaring suhol ngani magboto na pabor sa ratipikasyon kan 2026 national budget.
Tinawang-duon ni Suansing na malaya an lambang saro sa mga kongresista na magdesisyon basado sa saindang konsensya asin pangangaipo kan saindang mga nasasakupan.
Sinabi pa kan Kongresista, sa katunayan, ngani mapakusog an transparency asin accountability sa proseso kan budget, nag-implementar an Kamara nin nagkapirang reporma, kabali na an pagbilog kan Budget Amendment and Review Sub-Committee (BARSc), na mas mahiwas na konsultasyon sa civil society asin mas mahiwas na pagrepaso kan propuestong budget.
Sa kaenot-enoti man na pagkakataon, isinagibo an sarong bukas asin pag-livestream sa bicameral conference committee miting.
Nagpromesa man an liderato kan bicam na matao nin digital na kopya kan pinal na bersyon kan General Appropriations Bill sa mga kongresista antes an pagboto sa plenaryo.
Sa irarom kan propwesto, itinagama na pondo para sa mga operasyon kan gobierno sa taong 2026 na nagaabot sa ₱6.7 trilyon.
