LEGAZPI CITY – Nangapodan an mga residentes kan Barangay Gogon, Legazpi City mapadapit sa paggamit kan boga na saro sa mga ipinagbabawal na paputok kan mga otoridad.
Ini an kasunod kan may mga nakumpiskang boga an mga personahes kan Legazpi City Police Station na piggagamit kan mga menor de edad sa bisinidad kan kalayaan park.
Segun sa residente kan naunambitang barangay na si Josie Nabata sa intrevista kan Bombo Radyo Legazpi na nakakaperwisyo an boga urog na sa mga tawong may kamatean huli sa labing ribok na ipigkakawsa kaini.
Pig-enganyar niya man an konseho kan saindang lugar na tawan nin magkakanigong aksyon an siisay man na naggagamit kan mga ipinagbabawal na paputok.
Pigtaram pa kaini na importante man an tabang kan mga magurang sa pagbabawal kan saindang mga menor de edad na aki an pagpapaputok sa bagong taon nganing malikayan an firecracker related injuries.
Punto pa ni Nabata pwedesir man na maggamit na sana nin alternatibong pamparibok arug kan kaldero bilang pangtanggal nin malas nganing masyertong salbado an saindang pagselebrar sa pagsasalida nin taon.
