LEGAZPI CITY – Uminabot sa labi 800 na mga kapulisan an ipinakalat sa manlain-laing lugar sa provincia kan Albay katakod kan pagselebrar kan aldaw kan kapaskuhan.
Segun ki Albay Police Provincial Office Director Police Colonel Noel Nuñez sa intrevista kan Bombo Radyo Legazpi na nagin epektibo an saindang deployment nganing mamantenir an kamugtakan kan trapiko asin pazy orden.
Ipigdoon niya man na magpapadagos an saindang pagbabantay hasta sa bagong taon kun sain magkakaigwa nin serye nin inspeksyon sa mga lugar na ipigdesignar na firecraker selling asin fireworks display areas.
Nagin generally peaceful suboot an saindang monitoring sa aldaw kan kapaskuhan huli sa magayon na pag-analisar kan sitwasyon, crime incidents, asin pag-aram sa mga lugar na dapat pagtuunan nin pansin sa ground.
Nagmamawot man an opisyal na magigin kapareho kan resulta an saindang pagbabantay kan kapaskuhan arug kan saindang monitoring kan mismong aldaw kan pasko.
Dakulang bagay man suboot sa matrayumpong pagselebrar an koordinasyon kan namamanwaan sa mga kapulisan nganing tulos na maaksyunan an mga bagay na nangyayari sa mga komunidad.
Pagsyerto niya man na magpapadagos an saindang pagtugis sa mga tawong nagtatago asin pighahanap kan ley huli ta may posibilidad na mag-uruli an mga ini sa saindang residensya ngonian na holiday season.
Kahagadan ni Nuñez sa publiko na imantenir an saindang kooperasyon sa mga kapulisan nganing mamantenir an pazy orden sa bilog na provincia.
