LEGAZPI CITY – Pig-anunsyar kan Legazpi City Water District na nagkaigwa nin water interruption huli sa emergency shutdown kan PhilHydro, Inc.’s water treatment plant.
Segun ki Legazpi City Water District General Manager Rico Salazar sa intrevista kan Bombo Radyo Legazpi na nagresulta an shutdown makalihis na palitan an electrical circuit breaker kan planta kun sain madurar an shutdown poon alas-9 nin banggi kan December 23 asin piglalaomang magbalik saaga, December 24.
Obheto kan pagpapalit kan breaker nganing maglaog an kuryente sa makina na mabalik man kan regular na operasyon asin normal distribution kan tubig sa saindang miembros konsumidores.
Naghagad man siya nin dispensa sa mga residenteng naapektaran kan emergency shutdown urog nang nangyari ini pirang oras na sana antes magsapit an kapaskuhan.
Pigtaram pa kan opisyal na apektado kan nasabing shutdown an mga Barangay 1 sagkod 41 asin Barangay 57 hasta 59 kun sain naka-eksperyensya an mga ini nin low water pressure to no water supply, asin maluyang quality nin tubig.
Piglalaoman man ni Salazar na maibalik an normal water supply sa laog kan 24 oras makalihis na matapos an ginibong maintenance sa naunambitang planta.
