LEGAZPI CITY – Uminabot sa lima katawo an nagadan sa nangyaring sagupaan kan 83rd Infantry Battalion asin New Peoples Army sa Barangay Burabod, Lagonoy, Camarines Sur.
Segun ki Philippine Army 9th Infantry Division division public affairs office chief Major Frank Roldan sa intrevista kan Bombo Radyo Legazpi na gikan sa hanay kan New Peoples Arm an mga nagadan kun sain 3 sa mga ini iyo an pigtutukdong leader.
Napag-araman man na pigpoporbaran kan mga bandidong grupo na magbalik sa lugar na dati nindang kontrolado asin sa kagayunan suboot an tulos na nakapagsumbong an mga residente kun kaya marikas sindang nakapag-aksyon.
Pigdoon niya man na an matrayumpong opensiba an development sana kan saindang naenot na lakdang makalihis makakuwa nin high powered firearms an saindang tropa sa Barangay Pinamihagan na kataid kan lugar na pinangyarihan kan bakbakan.
Pigtaram pa kan opisyal na nagpapadagos an saindang operasyon nganing mapugo an mga bandidong grupo sa tahaw kan pagdeklara kan mga ini nin tigil-putukan ngonian na kapaskuhan.
Sa presente an nakikipagkoordinar na sinda sa mga pamilya kan mga nagadan nganing ma-ilubong an mga ini nin maray mantang naghagad man ini nin pakikidumamay sa mga nabayaang kaanak
Nagpasalamat man si Roldan sa publiko para sa saindang aktibong suporta asin nangapodan sa natatadang miyembro kan bandidong grupo sa rehiyon na magsuko na asin magbalik loob sa gobierno nganing malikayan an mga siring kaining insidente.
