LEGAZPI CITY-Nagmistulang ‘dagat nin dugo’ an baybayon sa Hormuz Island sa Iran makalihis an makusog na paguuran na nagresulta sa matingkad na pulang kulay sa dagat.
Bisto an lugar bilang “Red Beach” huli sa halangkaw na konsentrasyon kan iron-oxide-rich soil na mahihiling sa isla.
Sa puntong ini, huli sa paguuran narasay an mga pulang daga sa mga bangin asin dalisdis kan isla pasiring sa kadagatan, rason ngani magmistulang “blood-red” an tubig sa baybayon.
Segun sa report, an pangyayari nagtao nin atraksyon sa lugr asin nagin tampok sa internet, kun sain kadakol na turista asin lokal an nagheras kan mga ladawan asin video kan pulang kadagatan.
An isla kan Hormuz haloy nag bisto sa makukulay na geological formations na pigaapod na “gelak,” o pulang daga na piggagamit sa pigment, cosmetics, asin tradisyunal na produkto.
Mantang peligroso kun hihilingon, piglinaw man kan mga eksperto na natural ining proseso asin bako indikasyon kan polusyon o sakuna.
An iron oxide o hematite sa daga sa nasabing isla an pangenot na dahilan kan kakaibang kulay na mas nagigin matingkad tuyong tag-uran sa lugar.
An Hormuz Island, mahihiling sa Strait of Hormuz, na saro sa mga pinakapopular na destinasyon sa Iran.
