LEGAZPI CITY—Ipig-deploy an 802 personnel kan Albay Philippine National Police sa mga manlaen-laeng lugar sa provincia katakod kan saindang programang “Ligtas Kapaskuhan 2025”.
Segun ki Albay Provincial Police Office Provincial Director Police Colonel Noel Nuñez, sa intrevista kan Bombo Radyo Legazpi, ipigbugtak ninda an saindang mga personahes sa mga pig-aapod na places of convergence asin iba pang matatawong lugar sa provincia.
Nagbugtak man an saindang opisina nin mga checkpoint, motorized assistance desk, asin police assistance desk sa mga mall, tourist destination, asin iba pa nganing ma-asigurar an kaligtasan kan publiko.
Dugang ni Nuñez, na nakikipagkoordinar man sinda sa gobierno provincial kan Albay nganing mapahigot an paz y orden sa bilog na provincia.
Mientrastanto, nangapudan man an opisyal sa namamanwaan na siertohong nakakandado o kaya ipakahuron sa ibang kabisto na bantayan an harong en kaso na maghali; dae masyadong ipag-expose an mga gamit o impormasyon na pwedesir magtaong oportunidad sa mga parahabon; dae ipagparada an mga behikulo sa mga alanganin na lugar.
Siring man na ibitaran an pagpaputok na pwedesir makadisgrasya sa iba asin ipag-asigurar pirme an kaligtasan kan lambang saro sa anumang oras.
