LEGAZP CITY-Nagpoon na an limang aldaw na mandatory quarantine para kay dismissed Bamban, Tarlac Mayor Alice Guo asin an saiyang mga kapareho akusado sa Reception and Diagnostic Center (RDC) kan Correctional Institution for Women (CIW) sa Mandaluyong City.
Segun sa Bureau of Corrections (BuCor), an 5-day quarantine sarong standard protocol para sa gabos na new persons deprived of liberty (PDL) sa CIW.
Sa nasabing peryodo, si Guo, kaiba si Jaimelyn Santos Cruz asin Rachelle Joan Malonzo Carreon, maagi sa mahiwas na medical examination ngani na ma-assess an saindang pisikal na kamugtakan asin masierto na dai sinda magtataonin huma sa salud sa ibang mga preso.
Pagkatapos kan quarantine, ililipat sinda Guo sa regular na dormitoryo, kun saen sinda magtetenir sa laog nin 55 aldaw asin maagi sa mandatoryong oryentasyon, diagnostics asin kwalipikasyon.
Sa oras na makumpleto an bilog na 60 aldaw na proseso sa Reception and Diagnostic Center, dadarahon sinda Guo sa saindang itinalagang kwarters sa Maximum Security Camp, susog sa mga regulasyon para sa mga inmate na nasentensiyahan nin habang buhay na pagkakakulong.
Ipinaliwanag man ni BuCor Director General Gregorio Catapang Jr. na an nasambitang mga proseso, importante ngani matukoy an mga pangangaipohang pisikal asin sikolohikal kan mga bagong PDL, kun sain an mga impormasyon an gagamiton kan institusyon ngani makabilog nin sarong “individualized treatment plan o program.”
Marurumduman na kan Biyernes, pormal nang nailipat sinda Guo sa nasabing pasilidad hale sa Pasig City Jail Women’s Dormitory.
Isinagibo an paglipat kina Guo susog sa bisa kan Mittimus Order na inisyu kan Hukuman kan Regional Trial Court Branch 167.
Nahahampang si Guo asin an duwa pang akusado sa qualified human trafficking na hinatulan nin habangbuhay na pagkakakulong asin multa na nasa P2 million.
