LEGAZPI CITY-Plano kan Bureau of Immigration na ideportar an sarong ‘Chinese national’ na sinasabing iyo an ‘importer’ kan mag-agom na si Curlee asin Sarah Discaya sa saindang mga ‘luxury cars’.
Segun ki Bureau of Immigration Commissioner Joel Anthony Viado, ipigheras sa saiya ni Land Transportation Office Assistant Sec. Markus Lacanilao an pagdakop kay Cao Cheng, na pigtutubudang iyo an car importer kan mga Discaya.
Basado sa impormasyon, inarestar an nasabing Chinese national huli sa nagkapirang pagbalgar kan ley siring kan obstruction of apprehension and prosecution of criminal offender, illegal use of alias, false representation, asin willful misrepresentation of material information.
Nadakop si Cao sa Makati City asin nakakulong ngonian sa Special Operation Division kan Highway Patrol Group sa Camp Crame, Quezon City.
Afuera digdi, segun kay Immigration Commissioner Viado, na an naarestar na indibidwal an naggagamit nin ibang pangaran bilang Martin Zhao basado sa mga rekord.
Huli kaini, piglalaoman na maibalyo si Cao sa Immigration Facility sa Taguig City pagkatapos kan inquest proceeding asin medical examination.
Kun mapapatunayan man suboot na nagkasala ini sa mga akusasyon, maatubang an Chinese national sa’deportasyon’ asin ‘blacklisting’ sa Imigrasyon.
