Posibleng labi sa P180 bilyon an napaduman sa ghost flood control projects poon pa kan 2016, base sa datus hale sa poco mas o menos 10,000 na pig-inspection na proyekto, kun saen labi sa 600 an warang aktwal na implementasyon.
Segun ki Senate President Pro Tempore Ping Lacson, pigkakarkulong maabot sa 30,000 an total na flood control projects poon kan 2016.
Kun ibabase suboot sa ratio kan nadiskubreng ghost projects, pwedesir umabot sa 6% kan gabos na proyekto an dae nag-iiral na katampad nin P180 bilyong pondo.
Sinabi man kan senador na an Senate Blue Ribbon Committee nag-orolay sana nin sadit na porsyon kan mga posibleng anomalya, asin saiya nang iprinesentar sa mga privilege speeches kan Agosto asin Setyembre an dakula kan korapsyon sa mga ghost asin substandard flood control projects.
Nahahandal man an senador na sadit sana an ibinalik na P110 milyon ni dating DPWH district engineer Henry Alcantara kun ikukumpara sa total na kantidad na imbuelto, maski piglalaoman na magbalik pa ini nin dagdag na P200 milyon sa mga masunod na semana.
Pigsierto kan senador na preparado an Blue Ribbon Committee na makipagtabangan sa Independent Commission for Infrastructure, sa Department of Justice, asin sa Office of the Ombudsman enkaso magluwas an mga bagong impormasyon na pwedesir gamiton sa pagsangat nin kaso laban sa mga imbwelto.
Kasabay kaini, sinabi ni Lacson na naggigibo na nin mga lakdang an Senado nganing maibitaran an kaparehong mga anomalya sa budget process, kabale na an pag-livestream kan period of amendments asin pagpaluwas sa publiko kan gabos na individual budget amendments kan mga senador.
Obheto suboot kaining pugulan an pig-aapod niyang allocables, leadership funds, asin iba pang klase nin pork barrel sa 2026 national budget.
Segun ki Lacson, nagkasundo an Senado na tawan nin kapangyarihan si Sen. Sherwin Gatchalian na magdesisyon kun arin na mga amendment an aakoon o tatanggihan.
Sinabi man ni Lacson na nagdesisyon an Senado asin Kamara na pasimplehon an bicameral conference committee nganing pag-olayan sana an mga dae pinagkasunduan na probisyon asin likayan an paglaog nin mga “alien” provision.
