LEGAZPI CITY – Ipighayag kan Catanduanes Provincial Disaster Risk Reduction and Management Office na wara sindang nairehistrong dae piglalaomang insidente sa ibong kan magdamlagang pag-uuran na epekto ni Bagyong Verbena asin shearline.
Segun ki Catanduanes PDRRMO Emergency Operations Section Chief Roberto Monterola sa intrevista kan Bombo Radyo Legazpi na huli man sa mga pag-uuran an may mga banwaan man na nagkanselar nin klase.
Paglilinaw niya man na nasa lokal na gobierno na an desisyon kun magpapa-otob sinda nin localized class suspension huli ta kada banwaan an magkakaiba an panahon na namamatean.
Wara man sindang nairehistrong pagbabaha sa ibong kan ibinandera kan state weather bureau an orange rainfall warning sa saindang provincia.
Sa ibong kaini an pigtaram pa kan opisyal na naka-antabay pa man liwat sinda enkaso umabot sa 200 milimeter pataas na mga pag-uuran na pwedesir makapag-trigger nin mga landslide asin baha.
Pagirumdom ni Monterola sa mga byahero sa saindang lugar na mag-ingat, magin rigmat sa pagmamaneho, asin makipagkoordinar tulos sa saindang ofisina o sa mga Local Disaster Risk Reduction and Management Unit nganing makapagpadara tulos nin tabang enkaso mabarahan an tinampo huli sa landslide.
