LEGAZPI CITY-Nag-anunsyo an National Capital Region Police Office (NCRPO) na itataas sa full alert status an alert level kan mga ranggo kaini puon Nobyembre 28 bilang paghanda sa nakatalaan na mahiwsang pagtiripon para sa Trillion Peso March sa Nobyembre 30.
Segun kay NCRPO Spokesperson Police Major Hazel Asilo, nasa heightened alert status an saindang ranggo kasunod kan duwang aldaw na programa kan Iglesia ni Cristo (INC) sa Quirino Grandstand asin siring man sa Edsa People Power Monument sa pamamayo kan United People’s Initiative (UPI).
Dugang pa niya na obheto kaini na ma-account an gabos na uniformed personnel enkaso kinakaipuhan pa nin dugang na personahes sa mga venue kan mga programa asin pagtiripon sa aldaw na ini.
Apwera sa alert level asin deployment kan mga pulis, nag-designar man an Manila Police District (MPD) personnel kan Civil Disturbance Management (CDM) sa lugar kan Manila ngani masierto na nababantayan an gabos na lugar na posibleng bisitahon kan mga raliyista enkaso kaipuhanon.
Mientrastanto, nagsasagibo man nin live monitoring an ahensya sa paagi kan mga CCTV ngani marikas an pagresponde sa dae piglalaoman na mga pangyayari sa mga maabot na programa.
Nangapudan man an otoridad sa mga raliyista, na an Mendiola bakong para sa pagtiripon asin pagsagibo nin mga hiro protesta asin presenteng off limits ini para sa mga anuman na aksyon.
