LEGAZPI CITY – Nakatalaang magsagibo nin relief operation an konseho kan Barangay Buyoan sa ciudad nin Legazpi sa saindang mga residentes makalihis an namateang epekto ni Bagyong Uwan kan mga nakalihis na aldaw.
Segun ki Punong Barangay Ronaldo Miña sa intrevista kan Bombo Radyo Legazpi na wara sindang pipilion asin gabos na pamilya an papaabutan nin tabang huli ta gabos an apektado kan nasambitang raot nin panahon.
Base man sa saindang data, maabot sa 60% hasta 70% kan saindang mga residente an mga paraooma na permihang apektado tuyong igwa nin bagyong nagtatama sa ciudad.
Punto niya na an pondo kan Barangay an dapat mamatean asin matamasa kan gabos nindang mga residentes urog na sa panahon nin pangangaipuhan.
Pigtaram pa ni Miña na kompwesto an saindang relief goods nin magayon na klase nin bagas huli ta nagtutubod siya na kun matao man sana nin tabang an dapat special na nganing warang masabi sa sainda an mga makakaresibing residente.
Plano nindang punan an distribution sa maabot na Nobyembre 26 asin itatao ini sa kada purok nganing magin marhay asin matuninong an pagbabarewas kan ayuda.
