LEGAZPI CITY-Nangangapudan si Manila Archbishop Jose Cardinal Advincula sa publiko na magsunod sa ley asin likayan an mga “extra-constitutional” na paagi ngani maresolberan an mga problema sa tahaw kan lakop na protesta sa isyu nin korapsyon.
Sa pastoral message kan Cardinal ngonian na aldaw, hinagad kaini sa publiko na dai pagtugutan na mangibabaw an emosyon asin pirming magsunod sa estado nin ley.
Dapat suboot na an satuyang pagtubog sa nasyon asin sa mga demokratikong prinsipyo kaini, bako sa siisay man na indibidwal asin orog na bako para sa personal na interes.
Pig-eengganyar man ni Cardinal Advincula an publiko na magin madunong, kritikal asin maingat sa pag-analisar kan mga impormasyon na nareresibe asin ipinapaabot sa sainda.
Sinabi pa niya na virus an pagbuha asin salang impormasyon, na inaapod kan iba na “pandemic of lies” na suboot nagpaparalisa kan satong kakayahan na mamidbid an katotoohan asin karahayan.
Dugang pa niya na kun siring na obligasyon, bilang mga Kristyano, na beripikaron an impormasyon na nareresibe asin likayan an paghiras kan dai pa napapatunayan.
