LEGAZPI CITY-Naka-heightened alert status na an Coast Guard District Bicol huli sa pinagaantisiparang epekto kan Severe Tropical Storm Uwan sa Bicol Region.
Segun ki Coast Guard District Bicol Public Information Officer Coast Guard Ensign Alyzza Novie Bermal, sa intrevista kan Bombo Radyo Legazpi, na nakapagpadara na sinda nin sarong team sa Catanduanes, Sorsogon asin Masbate.
Magpapadara man suboot sinda nin saro pang team sa Camarines Sur asin Camarines Norte.
Naka-standby man an nasa 547 na Disaster Response Groups (DRG’s) sa bilog na rehiyon bilang preparasyon sa pagrerespondi sa gabos na mga isasagibong operasyon sa mga lugar.
Nakipag-koordinar naman an nasabing ahensya sa Office of the Civil Defense Bicol (OCD-Bicol) asin sa mga National Disaster Risk Reduction and Management Office (NDRRMO) kun sain an mga lugar na posibleng mapektaran kan bagyo.
Abilable naman suboot an saindang mga assets asin nakahanda na sinda para sa pagtatao nin asistensya enkaso magpaotob na nin pre-emptive evacuations.
Sa presente, awtomatikong kanselado an mga sea travels huli sa ipinaluwas na abiso asin tropical signal warning sa rehiyon.
Abiso man sa publiko na magin updated sa mga pigpapaluwas na impormasyon mapadapit sa nasabing bagyo.
