LEGAZPI CITY-Nagpahiling nin panibagong aktibidad an Mt. Kanlaon ngonian na aldaw makalihis na mairehistro an pagbuga ni abo sa crater kan bulkan susog sa footage na nakuwa kan Kanlaon Volcano Observatory.
Segun man sa Philippine Institute of Volcanology and Seismology (PHIVOLCS), an nasabing pagbuga an nagkrear nin abo asin aso na nagaabot sa langkaw na 300 meters kun sain pasiring ini sa parteng southeast sa lugar.
Kasunod kaini an nagtetenir na nakataas an Alert Level 2 sa bulkan, na nangangahulugang may padagos na moderate level kan volcanic unrest.
Pagirumdom man kan PHIVOLCS na an siring na alert level an indikasyon kan posibleng phreatic eruptions o biglaang pagsabog na pwedisir magresulta nin peligro sa mga nasa gilid kan nasabing bulkan.
Pigaabisuhan man kan mga awtoridad an publiko, orog na sa mga residente sa palibot kan bulkan, na ibitaran an pagrani sa 4-kilometer Permanent Danger Zone (PDZ) asin magsunod sa mga abiso kan lokal na gobierno asin kan mga katakod na ahensya.
