LEGAZPI CITY – Naka-standby na man an mga personahes kan Bureau of Fire Protection Legazpi mapadapit sa nagdadangadang na pagruso kan mga tawo sa mga kamposanto katakod kan Undas 2025.
Segun ki BFP Legazpi Public Information Unit Chief Senior Fire Officer II Norman Andes sa intrevista kan Bombo Radyo Legazpi na nakatalaan man nindang ibandera an full alert status poon sa Oktubre 30 asin matapos sa Nobyembre 2.
Nakapagkondusir na man suboot sinda nin mga inspeksyon sa mga terminal, pantalan, pampubliko asin pribadong sementeryo asin plano nindang sundan pa an serye kan inspection antes an mismong aldaw kan mga gadan.
Mahigot nindang ipinagbabawal sa mga bisinidad kan mga kamposanto an pagdadara nin mga matatarom na bagay, mga alcoholic beverages, asin iba pa.
Pigtaram pa kan opisyal na permihan nindang pagirumdom na reparuhon muna an mga bagay na pwedesir punan nin kasulo arug kan mga electrical wirings, pigluluto asin kandila nganing matuninong an pagbisita ninda sa saindang mga namaaram nang mahal sa buhay.
Afuera sa mga personahes an nakahanda na man nindang i-deploy an saindang mga firetrucks, ambulansya asin rescue trucks kun sain may kaniya-kaniya na ining popostehan na mga lugar.
Pagsyerto man ni Andes sa publiko na ngonian na todos los santos an magkakaigwa nin presensya kan saindang mga personahes an poco mas o menos pitong sementeryo na nakatugdok sa ciudad kan Legazpi.
