LEGAZPI CITY- Ikinadisganar kan grupo nin mga paratukdo an nadiskubre sa pagdangog kan Senado na kakarampot sana an mga nakumpletong classrooms sa presenteng taon.
Marurumduman na ipigbuyagyag ni Department of Public Works and Highways Secretary Vince Dizon na sa 1,700 na target na makumpleto na classrooms para sa taong 2025, 22 sana an nakumpleto an konstruksyon.
Segun ki Teachers Dignity Coalition Chairperson Benjo Basas sa intrevista kan Bombo Radyo Legazpi na dapat na maimbestigaran an nasabing isyu urog pang atagamahan na nin pondo an proyekto.
Aminado an opisyal na dakulang dagok ini sa sektor kan edukasyon urog pang dakol na mga classrooms an pigbabaranga sana ngani na mapagkasya an dakol na mga estudyante.
Nangapudan man si Basas sa gobierno na hidalian na an pag konstruir kan mga school buildings sa nacion ngani na magkaigwa nin bastanteng classrooms.
Ini an sa tahaw kan matinding pangangaipo sa classrooms ngani na matawan nin mas kumportableng espasyo an mga estudyante.
Mientras tanto, liwat man na sinabi kan opisyal na an pondo para sa flood control an dapat na ilipat na sana sa sektor kan edukasyon.
