LEGAZPI CITY-Paiimbestigaran na ni Senate Committee on Basic Education Chairman Senador Bam Aquino an kahandaan kan public school buildings sa bilog na nacion enkaso tumama an makukusog na linog, makalihis an mga nagyaring pagyugo sa manlain-lain na lugar.
Segun kay Aquino, magsasangat siya nin resolusyon ngani mahiling an pundasyon asin kaligtasan kan school buildings laban sa paglinog.
Tinawan doon man niya an importansya kan pagsisierto sa kaligtasan asin kalidad kan mga edipisyo kan mga ekswelahan, orog na suboot sa nakalihis na pag-ako ni dating Department of Public Works and Highways (DPWH) Assistant District Engineer Brice Hernandez na gabos na proyektong imprastraktura sa Bulacan poon 2019 an hasta ngonian an mga substandard, kaiba na an mga eskwelahan.
Ibubusol man ni Aquino an paglalaan nin dugang na pondo para sa inspeksyon asin pagbusisi sa mga pampublikong eskwelahan ngani masierto an tibay asin kaligtasan kan mga ini.
Kairiba man suboot sa iimbestigaran an mga propwestong lakdang ngani mapakaskas an disaster preparedness kan mga eskwelahan, siring kan regular na inspeksyon, pagsasagibo nin earthquake drills, evacuation protocols, asin an pagkakaigwa nin mga bastanteng earthquake emergency kit.
Afuera digdi, an pagoolayan man suboot an planong imbestigasyon asin pahiro kan mga katakod na ahensya ngani masierto man na magamit giraray kan mga estudyante an mga apektadong eskwelahan sa madalian na panahon.
