LEGAZPI CITY—Karsel an bagsak kan sarong lalaki makalihis na makuahan nin mga badil asin bala sa ikinundusir na operasyon kan Legazpi City Police Station sa ciudad kan Legazpi.
Binisto an suspek na si alyas “Alex” residente kan nasabing ciudad.
Enot na inarestar an suspek sa kasong pagbalgar sa Republic Act 9262 (Violence Against Women and their Children) makalihis ining ireklamo kan saiyang agom.
Basado sa reports, mantang ipigsairarom sa imbestigasyon kan Duty Women and Children Protection Desk Investigator an nasabing suspek, narekober sa saiyang walang bulsa na sulot nin pantalon na maong an sarong magasin na kargado nin 13 bala nin 9 mm.
Sa kadugangang pagsisiyasat, ibinuyagyag kan agom kan suspek na igwa pa ining mga badil sa saindang harong asin boluntad na nagpahayag nin kahandaang isuko an mga ini sa pulisya para sa saindang kaligtasan.
Nagpasiring an mga otoridad sa harong kan mag-agom kun saen isinuko kan nagreklamo an sarong Glock Caliber 9 mm pistol, sarong magasin na may 13 bala; asin Taurus Caliber 9mm pistol na may duwang magasin na parehong mga tig-pitong bala asin nakabugtak sa sarong itom na Taurus Gun Box.
Mientrastanto, nasa kustodiya na kan Legazpi CPS an mga nakuwang ebidensya para sa magkakanigong disposisyon.
Naghahanda na man an hepatura nin mga kinakaipuhang dokumento para sa inquest proceedings asin pagsagibo nin firearm verification sa Regional Civil Security Unit 5 nganing aramon kun may magkakanigong dokumento an mga nakumpiskar na badil.
