LEGAZPI CITY – Dismayado an sarong political analyst sa pagdesignar ni Presidente Ferdinand Marcos Jr. kay Justice Secretary Jesus Crispin “Boying” Remulla bilang bagong Ombudsman.
Segun ki Constitutional Law Expert Atty. Michael Henry Yusingco, sa intrevista kan Bombo Radyo Legazpi na dapat an magin Ombudsman an warang koneksyon sa Presidente huli ta pirang beses na ining nangyari sa historya kan Pilipinas na harani sa administrasyon an namamayo sa nasambitang ofisina.
Nahahandal siya huli ta magigin protective si Remulla sa pamilya kan Presidente asin magigin selective an pagpapanimbag niya sa mga opisyal na imbwelto sa korapsyon urog na ngonian sa orolay kan anomalya sa mga flood control projects.
Sa hiling niya man an dae magigin independent an paghiro kan Ombudman huli ta magigin protective ini sa tawong nagdisignar saiya sa posisyon asin pwedesir na i-octaba kaini an pagsasagibo nin imbestigasyon enkaso igwang alegasyon na ipiggagapo sa Presidente.
Pigtaram pa kan naunambitang political analyst na dae kinonsidera kan Judicial and Bar Council an pagigin harani kan opisyal sa Presidente nganing ma-disqualify huli sa pagkakaigwa nin conflict of the interest.
Punto niya na maski valid an pagka-appoint ni Remulla an magkakaigwa man liwat ini nin problema sa mga masunod na panahon asin dapat warang naglalaog na pulitika sa pagdesignar kan Presidente sa masunod na Ombudsman.
Dapat suboot na dae na pag-arugon ni Ombudsman Remulla na pareho siya sa mga nakaaging ombudman asin ipahiling sa taumbayan na dae niya po-protehiran si Presidente Marcos asin panimbagon an mga kaalyadong imbwelto sa katiwalian.
Pagdoon niya pa na kun an Ombudsman an maluya sa saiyang trabaho an laoman nang labing maluya an check and balance kun sain an mga corrupt an makusog an boot huli ta sa mga nangyari ngonian sa Pilipinas an dae man mangyayari an mga ghost projects kun maisog an nakaaging Ombudsman sa pag-otob kan saiyang mandato.
