LEGAZPI CITY – Inarestar kan Manito Municipal Police Station an sarong lalaki huli sa kasong attempted homicide sa Purok 5, Barangay Sugoy, Castilla, Sorsogon.
Segun ki Manito MPS Chief Investigator Police Executive Master Sergeant Rolan Almanza sa intrevista kan Bombo Radyo Legazpi na binisto an suspetsado na si alyas “antonio”, 54 anyos, may agom, driver asin residente kan Barangay It-Ba, Manito, Albay na dinakop huli sa bisa kan mandamiento de aresto.
Basado sa saindang imbestigasyon an napag-araman na rinapas suboot an saiyang ka-trabaho nin tubo sa payo mantang nasa katahawan kan byahe huli sa posibleng dae pagkakasinabotan.
Susog man sa mga salaysay kan ibang mga ka-trabaho kan duwa an nagluluwas na kalaog pa sana sa saiyang trabaho an biktima asin nataon na nag-pahinante sa suspetsado na madali suboot na mag-init an payo.
Pigtaram pa kan opisyal na huli sa aksidente an nagsapo nin malalalang tama sa payo an biktima na nagin rason man kan pagsusunad niya nin kaso laban sa suspetsado.
Sa presente an nagtetenir na sa kustodiya kan Manito MPS an suspetsado para sa magkakanigong disposisyon mantang may ipigbugtak man na pyansa sa naunambitang kaso para sa saiyang temporamenteng libertad.
Pagirumdom ni Almanza sa publiko na sa mga siring kaining insidente an mas maray na suboot na maglikay na sana sa pagigin mainit an payo nganing dae na mauli sa mga insidente nin pangungulog na pwedesir mauli sa paggadan.
