LEGAZPI CITY – Dagit na ibinuyagyag ni Albay First District Representative Krisel Lagman an sarong pigtutugdok na ridge road sa Bacacay, Albay sa isinagibong meeting kan provincial government of Albay na inatendiran kan mga opisyales kan Department of Public Works and Highways Bicol.
Segun ki Rep. Lagman na poon 2019 sagkod sa presenteng taon an napondohan an naunambitang pa-tinampo nin poco mas o menos P4 Billion alagad wara man suboot na naka-istar asin naka 4 to 6 lanes pa asin may solar street lights sa mag-inibong.
Punto pa kan kongresista na ipigbugtak an naunambitang pondo kan gobierno sa lugar na warang katawo-tawo asin sagkod ngonian an dae pa natu-turn over sa Local Government Unit huli ta may nakabantay pang security na gikan man sa contractor na Sunwest Inc.
Pigdoon pa niya na afuera sa mga bantay na dae nagpapalaog sa naunambitang proyekto an napag-araman man na may helipad pang ipigtugdok alagad nanindugan an DPWH Bicol na wara ini sa program of work kun kaya palaisipan sainda kun siisay an naggastos sa pagpapatugdok kan helipad.
Pigtaram pa ni Rep. Lagman na ano an magigin justification kan DPWH sa Regional Development Council mapadapit sa return of investment kan proyekto huli ta nagtutubod siyang dae man ini matao nin benipisyo sa namamanwaan kun wara man ki naka-istar sa pinaggibuhan kan proyekto.
Nanindugan an mambabatas na an pondo kan namamanwaan an dae pwedesir na gamiton nganing ma-benipisyuhan an pribadong negosyante kun kaya dae pwedesir na magbuta-butahan huli ta aram ninda kun sain ini paduman.
Maski suboot na hale ini sa insertion, napahapot na sana ini kun “helpless” na an gobierno asin sisay an ma-ataman kan mga tawo kun an mismong ahensya an dae nagtataram.
Pighayag pa ni Rep. Lagman na nagtetenir na mga biktima an mga residentes kan baranggay Cagbulacao asin Manaet sa mga pagbabaha huli ta napaduman an pondo sa paggibo nin mga proyekto sa mga kabuludan maski dae man nagbugtak nin slope protetction asin drainage.
