LEGAZPI CITY—Nagkundusir na nin hararom na imbestigasyon an mga otoridad sa Bacacay, Albay, makalihis an nangyaring kinaimbueltohan kan mga menor de edad sa sarong eskwelahan sa nasabing lugar kan Byernes, Agosto 7.
Magigiromdomang nagsapo nin lugad an sarong estudyante sa Zamora Memorial College makalihis an suboot pagporbar kaining agawon an kutsilyong kapot kan kapwa estudyante sa laog nin classroom.
Segun ki Bacacay MPS, Chief of Police Police Major Niño Aquitan, sa intrevista kan Bombo Radyo Legazpi, hinagadan na ninda nin mga salaysay an mga imbuelto sa insidente kun ano an totoong nangyari.
Sa presente an pigtutubudang suspek asin biktima na parehong menor de edad an nasa pangangatamanan kan saindang mga magurang.
Nakikipagkoordinar na man an kapulisan sa Department of Social Welfare and Development para sa pagkundusir nin interview asin counseling sa mga imbueltong joven.
Basado sa pakikipag-olay sa mga imbueltong menor na an pinakakawsa kun nata nangyari an insidente an huli sa mga dae naresolbaran na personal conflict kan mga nakalihis na aldaw.
Pighihiling ngunyan kan mga otoridad kun ano an anggulo kun nata nag-abot sa pagdara kan pigtutubudang minor suspect nin kutsilyo sa nasabing eswkwelahan.
Dakol suboot na target an minor suspect alagad nangyari na nairido an saro sa mga estudyante huli sa pagporbar kaining agawon an kutsilyong dara kan minor suspect.
Dugang kan opisyal na posibleng dae napansin kan mga security sa eskwelahan na may darang kutsilyo ini huli sa nakatago ini sa saiyang backpack.
Tinawan-doon ni Aquitan na joined responsibilty an pagmantinir kan paz y orden na kun sain dapat makipagkoordinar an mga eskwelahan sa mga otoridad—siring kan pagdugang nin securityforces asin pahigoton an pag-inspeksyon.
Nilinaw man kaini na ginibo kan Zamora Memorial College an saindang parte, alagad may pangyayari sana suboot an dae man pinaglalaoman.
Nangapudan man siya sa mga magurang na gibohon man an saindang parte sa paagi kan pag-monitor sa saindang mga aki nganing maaraman an saindang kamugtakan.
