LEGAZPI CITY—Padagos an pagkundusir nin information dissemination kan Coast Guard Catanduanes sa gabos na parasisira sa isla mapadapit sa mga abiso urog na ngunyan na may pigbabantayang bagyo sa nacion.
Segun ki Coast Guard Station Catanduanes Commander Lieutenant Junior Grade Kees Villanueva, sa intrevista kan Bombo Radyo Legazpi, naki-olay an opisyal na dae na muna maglawod huli sa nakabandera na nasa irarom na kan Tropical Cyclone Wind Signal no. 2 an isla provincia kan Catanduanes.
Pig-abisuhan man ni Villanueva an gabos na passenger vessels asin cargoes na maghanap muna nin mateteniran para man sa kaligtasan kan saindang crew asin vessels.
Basado man sa reports kan iba pang Coast Guard stations sa provincia na wara man sindang nairehistrong na-stranded na pasahero o cargoes na pasiring sa Tabaco port huli ta nag-abiso na an nagkapirang shipping lines kan nakaaging aldaw na dae sinda mabiyahe huli sa piglalaomang bagyo.
Nakatalaan man na ngunyan na aldaw an iche-check in na ninda sa Emergency Operations Center Catanduanes an saindang mga assets asin mga personahes para man sa nagpapadagos na preparasyon kan saindang opisina.
